‘सबै जलेर राख भयो, के खाने, कहाँ बस्ने ?’

१४ वैशाख, जनकपुरधाम । महोत्तरीको मटिहानी नगरपालिका ६ जरलहवागाछी टोलकी विमलादेवी पासवान बिहीबार दिउँसो ४ बजेतिर जलेर खरानी भइसकेको आफ्नो घरअगाडि बिलौना गर्दै थिइन्, ‘अब कहाँ बस्ने, के लगाउने, के खाने ? ठूलो विपत्त पर्‍यो ।’

छिमेक मुस्लिम बस्तीमा सल्केको आगोले बुधबार दिउँसो पासवानको घर हेर्दाहेर्दै खरानी बनाएको थियो । एकाएक बेघर बनेकी उनी अहिले २ छोरी, नातिनातिना र आमासहित ६ जना नगरपालिकाले दिएको त्रिपालमुनि दिनरात काट्न बाध्य छन् ।

बुधबार दिउँसो १२ बजेतिर करिब सय मिटर परको जरलहावागाछी मुस्लिम बस्तीमा आगलागीको हल्ला भयो । छिमेकमा आगलागीको हल्ला सुनेपछि घरमै बसिरहेकी विमलादेवी पनि अत्तालिइन् ।

हत्तपत्त उनका परिवारका सदस्य बाहिर निस्केर फुसको घरको छानोमा पानी छर्किएर बचाउने उपायमा लागे ।

त्यतिबेलै आगलागी भएको बस्तीबाट ठूलो विस्फोटको आवाज आयो । आगलागीमा पड्केको ग्यास सिलिन्डरले आगोको झिल्को सय मिटर पर छिमेकको घरमाथि खस्यो । चलिरहेको तातो हावाले विमलाको घर पनि आगलागीको चपेटामा पर्न समय लागेन ।

हेर्दाहेर्दै बस्तीभरका घर एकएक गर्दै दनदनी बल्न थाले ।

‘उता आगलागीमा ग्यास सिलिन्डर बिस्फोटको आवाज आयो । पडोसीको घरमा पनि आगो लाग्यो । मेरो घर पनि बाँकी रहेन’, विमलाले दुखेसो पोखिन्, ‘हेर्दाहेर्दै क्षणभरमै मेरो घर खरानी भयो । केही पनि झिक्न सकिनँ । रुपैयाँ, पैसा, अन्न, लत्ताकपडा, नागरिकता सबै जल्यो ।’

विमलाका श्रीमान विपतीया २ वर्षदेखि वैदेशिक रोजगारमा छन् भने २ छोरा पनि भारतमा मजदुरी गर्छन् । ४ दिनअघि मात्रै छोरा इन्द्रले मद्रासबाटा घरखर्चका लागि १० हजार भारु पठाएका थिए । त्यो पैसासँगै विमला खाने अन्न र लताकपडा केही बाँकी रहेन ।

०००

मुस्लिम बस्तीकी ६२ वर्षीया खैरुन खातुन खेतमा काम गरिरहेका श्रीमान ७२ वर्षीय मो अजिज शेखलाई खाना पुर्‍याएर भर्खर घर फर्केकी थिइन् । आँगनमा फलेको करेला टिपिरहेको बेला आगलागीको हल्ला सुनिन् ।

धुवाँको मुस्लो हेरेर अत्तालिएकी खातुन ‘केही बचाउँछु कि !’ भन्ने सोच्दै थिइन्, त्यतिकैमा ग्यास सिलिन्डर विस्फोट भएको चर्को आवाज आयो । आगोको झिल्को उनकै खरको छानामाथि खस्यो ।

‘मैले त पकाएको भात पनि खान सकिनँ । करेला टिपेर पकाएको भात खान्छु सोचेको थिएँ’, खातुन निरस सुनिइन्, ‘छेउको घरमा आगो लागेको हल्ला सुनें । घरबाट केही झिक्न पनि सकिनँ । सबै जलेर राख भयो ।’

खातुनले पछि मात्र थाहा पाइन्, सुरुमा आगोको चपेटामा परेको त आफ्नै जेठो छोरा मोहम्मद वामिल शेषको घर पो रहेछ !

जेठो छोरा मोहम्मदकै त्यही घरको छेउको परालबाट आगो सल्केको खातुनले बताइन् । उनको साइँलो छोरा मोमिद शेषको घर पनि आगलागीमा जलेर खरानी भयो ।

दिउँसोको समयमा आगलागी भएको हुँदा मानवीय क्षति भने हुन नपाएको उनको भनाइ छ । ‘दिउँसो थियो । सबै भागेर ज्यान बचाए । राति यस्तो आगलागी भएको भए कयौं मान्छे जलेर मर्थे होला’, खैरुनले भनिन् ।

खैरुनका ५ छोरा छन् । सबैसँग अंशबन्डा भइसकेको छ । त्यसमध्ये २ छोरा सुकुम्बासी बस्तीमै घर बनाएर बसेका थिए भने बाँकी ३ छोरा अन्यत्रै छन् ।

‘मेरो पति बुढेसकालमा ब्यालुन बेच्नु हुन्छ । मेरोजस्तै छोराहरुको फुसकै घर थियो । खाने लाउने अब कसैको बाँकी रहेन’, खातुनले भनिन्, ‘के खाने, कसरी घर बनउने, बस्ने ? हामी सहयोगबिना बाँच्न गाह्रो छ ।’

विमला र खैरुनजस्तै जरलहवागाछी टोलका १ सय १५ घरपरिवारको अवस्था अहिले यस्तै छ । बस्तीमा भएको १ सय २५ परिवारको घर जलेर नष्ट भएको मटिहानी नगरपालिकाका मेयर हरिप्रसाद मण्डल बताउँछन् । १० वटा वारुणयन्त्र, ३ सय जनाभन्दा बढी सुरक्षाकर्मी, स्थानीयको सहयोगमा ६ घण्टापछि आगो नियन्त्रण भएको थियो ।

घर जलेकाहरु सबै सुकुम्बासी हुन् । उनीहरु गुठीको ऐलानी जग्गामा वर्षाैंदेखि फुसकै घर बनाएर बस्दै आएका थिए । जनमजदुरी गरेर जीविकोपार्जन गर्ने उनीहरुको घर जल्दा खान लाउने, बस्ने समस्याले बिल्लीबाठ भएको छ ।

बालबालिकासहित जरलहवागाछी टोलका अग्निपीडितले पहिलो रात खुल्ला आकाशमुनि रात बिताए । चिउरा, चाउचाउ खाएर रात काटे । सबै राहतको पर्खाइमा छन् ।

पीडितलाई विभिन्न संघसंस्थाबाट राहत

आगलागी पीडितहरुको राहतको लागि मटिहानी नगरपालिका, जिल्ला विपद् व्यवस्थापन समिति तथा विभिन्न संघसंस्थाहरु जुटेका छन् ।

नेपाल रेडक्रस सोसाइटी महोत्तरी शाखाले बिहीबार प्रभावित सय घर धुरीलाई प्रति परिवार वाल्टिन १ थान, जग १ थान, र मटिहानी नगरपालिकाले त्रिपाल १ थान, चिउरा २ किलो, चिनी ५ सय ग्राम, पानीको बोतल २ थान राहत सामग्री उपलब्ध गराइएको छ ।

त्यस्तै, मटिहानी नगरपालिकाले प्रतिपरिवार ५ हजार नगद, २५ किलो चामल, ४ किलो दाल वितरण गरेको मेयर हरिप्रसाद मण्डलले बताए । अग्निपीडित क्षेत्रमा बिहीबार नेपाल–भारतमैत्री युवा संघ, जनकपुर न्युरो हस्पिटललगायतले पनि सहयोग उपलब्ध गराएका छन् ।

महोत्तरीका प्रमुख जिल्ला अधिकारी शिवराम गोलालका अनुसार जिल्ला विपद् व्यवस्थापन समितिको बिहीबार बसेको बैठकले विपद् व्यवस्थापन कोषवाट पीडित प्रतिपरिवार २० हजारको दरले राहत रकम तत्काल उपलब्ध गराउने निर्णय गरेको छ ।

आगलागी पीडितहरुको दीर्घकालीन व्यवस्थापनका लागि गृहमन्त्रालय, पुनर्निर्माण प्राधिकरणको टोली निरीक्षणको लागि आएको प्रमुख जिल्ला अधिकारी गोलालले बताए ।

‘अहिलेसम्म जेजति भइरहेको छ अल्पकालीन विषयको लागि हो । दीर्घकालीन व्यवस्थापनका लागि गृहमन्त्रालय, पुनर्निर्माण प्राधिकरणको टोली निरीक्षणको लागि आएको छ’, गोलालले भने, ‘निरीक्षण गरेर यस विषषमा रिपोर्ट तयार गरी के गर्ने नगर्ने विषय टुंगिन्छ ।’

Impulsado tumen le Ts'o'ok laj RSS Plugin Tuméen CodeRevolution.